ಆನ್‌ಲೈನ್‌ನಲ್ಲಿ ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ವಿರುದ್ಧ ಹೋರಾಡುವುದು

Google Search ಮೂಲಕ ಮಾಹಿತಿಯನ್ನು ಸುಲಭವಾಗಿ ಹುಡುಕಬಹುದು, ಆದರೆ ಕಾನೂನುಬಾಹಿರವಾದ, ಅಥವಾ ಮಕ್ಕಳನ್ನು ಲೈಂಗಿಕವಾಗಿ ಶೋಷಿಸುವ ಕಂಟೆಂಟ್ ಅನ್ನು Search ಪ್ರಸ್ತುತಪಡಿಸುವುದನ್ನು ನಾವೆಂದೂ ಬಯಸುವುದಿಲ್ಲ. ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ಚಿತ್ರಣ, ಅಥವಾ ಮಕ್ಕಳನ್ನು ಲೈಂಗಿಕವಾಗಿ ಬಲಿಪಶುಗಳನ್ನಾಗಿಸುವ, ಅಪಾಯಕ್ಕೆ ಗುರಿಯಾಗಿಸುವ ಅಥವಾ ಅನ್ಯಥಾ ಶೋಷಿಸುವ ಹಾಗೆ ತೋರುವ ಸಾಮಗ್ರಿಯ ಕಡೆಗೆ ಕರೆದೊಯ್ಯುವ ಹುಡುಕಾಟ ಫಲಿತಾಂಶಗಳನ್ನು ನಿರ್ಬಂಧಿಸುವುದು ನಮ್ಮ ನೀತಿಯಾಗಿದೆ. ವರ್ಧಿಸುತ್ತಿರುವ ಈ ಬೆದರಿಕೆಗಳ ವಿರುದ್ಧ ಹೋರಾಡಲು ನಮ್ಮ ಅಲ್ಗಾರಿದಮ್‌ಗಳನ್ನು ನಾವು ಸತತವಾಗಿ ಅಪ್‌ಡೇಟ್ ಮಾಡುತ್ತಿದ್ದೇವೆ.

CSAM ಕಂಟೆಂಟ್ ಅನ್ನು ಕೋರುತ್ತಿವೆ ಎಂದು ನಮಗೆ ಕಂಡುಬರುವ ಹುಡುಕಾಟಗಳಿಗೆ ನಾವು ಹೆಚ್ಚುವರಿ ರಕ್ಷಣೆಗಳನ್ನು ಅನ್ವಯಿಸುತ್ತೇವೆ. ಮಕ್ಕಳು ಮತ್ತು ಲೈಂಗಿಕ ಕಂಟೆಂಟ್‌ನ ನಡುವಿನ ಕೊಂಡಿಯನ್ನು ತಪ್ಪಿಸುವುದಕ್ಕಾಗಿ, ಹುಡುಕಾಟ ಪ್ರಶ್ನೆಯು CSAM ಅನ್ನು ಕೋರುತ್ತಿರುವ ಹಾಗೆ ಕಂಡುಬಂದರೆ ನಾವು ಅಶ್ಲೀಲ ಲೈಂಗಿಕ ಫಲಿತಾಂಶಗಳನ್ನು ಫಿಲ್ಟರ್ ಮಾಡಿ ಹೊರಗಿಡುತ್ತೇವೆ, ಮತ್ತು ವಯಸ್ಕ ಅಶ್ಲೀಲ ಕಂಟೆಂಟ್ ಅನ್ನು ಕೋರುವ ಪ್ರಶ್ನೆಗಳಿಗೆ Search, ಮಕ್ಕಳನ್ನು ಒಳಗೊಂಡಿರುವ ಚಿತ್ರಣವನ್ನು ಮರಳಿಸುವುದಿಲ್ಲ. ಅನೇಕ ದೇಶಗಳಲ್ಲಿ, ಸ್ಪಷ್ಟವಾಗಿ CSAM ಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ನಮೂದಿಸುವ ಬಳಕೆದಾರರಿಗೆ, ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ಚಿತ್ರಣವು ಕಾನೂನುಬಾಹಿರವಾಗಿದೆ ಎಂಬ ಎಚ್ಚರಿಕೆಯನ್ನು ಎದ್ದುಕಾಣುವ ಹಾಗೆ ತೋರಿಸಲಾಗುತ್ತದೆ, ಜೊತೆಗೆ ಈ ಕಂಟೆಂಟ್ ಅನ್ನು ಯು.ಕೆ. ಯಲ್ಲಿ ಇಂಟರ್ನೆಟ್ ವಾಚ್ ಫೌಂಡೇಶನ್, ಕೆನಡಿಯನ್ ಸೆಂಟರ್ ಫಾರ್ ಚೈಲ್ಡ್ ಪ್ರೊಟೆಕ್ಷನ್ ಹಾಗೂ ಕೊಲಂಬಿಯಾದಲ್ಲಿ ತೆ ಪ್ರೊತೆಹೊದಂತಹ ವಿಶ್ವಾಸಾರ್ಹ ಸಂಸ್ಥೆಗಳಿಗೆ ವರದಿ ಮಾಡುವುದು ಹೇಗೆ ಎಂಬ ಮಾಹಿತಿಯನ್ನು ತೋರಿಸಲಾಗುತ್ತದೆ. ಈ ಎಚ್ಚರಿಕೆಗಳನ್ನು ತೋರಿಸಿದಾಗ, ಬಳಕೆದಾರರರು ಇಂತಹ ಸಾಮಗ್ರಿಯ ಹುಡುಕಾಟವನ್ನು ಮುಂದುವರಿಸುವ ಸಾಧ್ಯತೆ ಕಡಿಮೆಯಾಗುತ್ತದೆ.

YouTube ನಲ್ಲಿ, ಮಕ್ಕಳನ್ನು ಲೈಂಗಿಕವಾಗಿ ಬಿಂಬಿಸುವ ಅಥವಾ ಶೋಷಿಸುವ ವೀಡಿಯೊಗಳು, ಪ್ಲೇಪಟ್ಟಿಗಳು, ಥಂಬ್‌ನೇಲ್‌ಗಳು ಹಾಗೂ ಕಾಮೆಂಟ್‌ಗಳ ವಿರುದ್ಧ ನಾವು ಈ ಹಿಂದಿನಿಂದಲೂ ಸ್ಪಷ್ಟವಾದ ನೀತಿಗಳನ್ನು ಹೊಂದಿದ್ದೇವೆ. ಈ ನೀತಿಗಳ ಉಲ್ಲಂಘನೆಗಳನ್ನು ಪೂರ್ವಭಾವಿಯಾಗಿ ಪತ್ತೆಹಚ್ಚಲು ನಾವು ಮಷಿನ್ ಲರ್ನಿಂಗ್ ಸಿಸ್ಟಂಗಳನ್ನು ಬಳಸುತ್ತೇವೆ ಮಾತ್ರವಲ್ಲದೆ, ನಮ್ಮ ಸಿಸ್ಟಂಗಳು ಪತ್ತೆಹಚ್ಚಿದ, ಅಥವಾ ಬಳಕೆದಾರರು ಹಾಗೂ ನಮ್ಮ ವಿಶ್ವಾಸಾರ್ಹ ಫ್ಲ್ಯಾಗರ್‌ಗಳು ಫ್ಲ್ಯಾಗ್ ಮಾಡಿದ ಉಲ್ಲಂಘನೆಗಳನ್ನು ಕ್ಷಿಪ್ರವಾಗಿ ತೆಗೆದುಹಾಕುವ, ಪರಿಶೀಲನೆ ಮಾಡುವ ವ್ಯಕ್ತಿಗಳನ್ನು ಪ್ರಪಂಚದಾದ್ಯಂತ ಹೊಂದಿದ್ದೇವೆ.

ಅಪ್ರಾಪ್ತ ವಯಸ್ಕರನ್ನು ಒಳಗೊಂಡಿರುವ ಕೆಲವೊಂದು ಕಂಟೆಂಟ್ ನಮ್ಮ ನೀತಿಗಳನ್ನು ಉಲ್ಲಂಘಿಸದಿರಬಹುದಾದರೂ, ಅಪ್ರಾಪ್ತ ವಯಸ್ಸಿನ ಆ ವ್ಯಕ್ತಿಯು ಆನ್‌ಲೈನ್ ಅಥವಾ ಆಫ್‌ಲೈನ್ ಶೋಷಣೆಗೆ ಗುರಿಯಾಗುವ ಅಪಾಯ ಹೊಂದಿರಬಹುದು ಎಂಬುದನ್ನು ನಾವು ಗುರುತಿಸುತ್ತೇವೆ. ಆದ್ದರಿಂದಲೇ, ನಾವು ಈ ನೀತಿಗಳನ್ನು ಜಾರಿಗೊಳಿಸುವಾಗ ಹೆಚ್ಚಿನ ಜಾಗರೂಕತೆಯ ಮಾರ್ಗವನ್ನು ಅನುಸರಿಸುತ್ತೇವೆ. ಅಪ್ರಾಪ್ತ ವಯಸ್ಕರನ್ನು ಅಪಾಯಕ್ಕೆ ಗುರಿಯಾಗಿಸಬಹುದಾದ ವೀಡಿಯೊಗಳನ್ನು ಪೂರ್ವಭಾವಿಯಾಗಿ ಗುರುತಿಸಲು ನಮ್ಮ ಮಷಿನ್ ಲರ್ನಿಂಗ್ ಸಿಸ್ಟಂಗಳು ಸಹಾಯ ಮಾಡುತ್ತವೆ ಮತ್ತು ಲೈವ್ ಫೀಚರ್‌ಗಳನ್ನು ನಿರ್ಬಂಧಿಸುವುದು, ಕಾಮೆಂಟ್‌ಗಳನ್ನು ನಿಷ್ಕ್ರಿಯಗೊಳಿಸುವುದು ಹಾಗೂ ವೀಡಿಯೊ ಶಿಫಾರಸುಗಳನ್ನು ಸೀಮಿತಗೊಳಿಸುವಂತಹ ಕ್ರಮಗಳ ಮೂಲಕ ನಮ್ಮ ರಕ್ಷಣೆಗಳನ್ನು ಸೂಕ್ತ ರೂಪದಲ್ಲಿ ಅನ್ವಯಿಸುತ್ತವೆ.

ಆನ್‌ಲೈನ್‌ನಲ್ಲಿ ಮಕ್ಕಳ ಮೇಲಿನ ದೌರ್ಜನ್ಯ ಸಾಮಗ್ರಿಯ ವಿರುದ್ಧ ಹೋರಾಡುವ ನಿಟ್ಟಿನಲ್ಲಿ Google ನ ಪ್ರಯತ್ನಗಳ ಕುರಿತಾದ ಪಾರದರ್ಶಕತೆ ವರದಿಯೊಂದನ್ನು ನಾವು 2021 ರಲ್ಲಿ ಬಿಡುಗಡೆ ಮಾಡಿದೆವು ಮತ್ತು ನಾವು NCMEC ಗೆ ಎಷ್ಟು ವರದಿಗಳನ್ನು ಸಲ್ಲಿಸಿದ್ದೇವೆ ಎಂಬುದನ್ನು ಇದರಲ್ಲಿ ವಿವರಿಸಿದೆವು. ಈ ವರದಿಯು YouTube ನಲ್ಲಿ ನಮ್ಮ ಪ್ರಯತ್ನಗಳ ಕುರಿತಾದ ಡೇಟಾವನ್ನು ಸಹ ಒದಗಿಸುತ್ತದೆ, ನಾವು Search ನಲ್ಲಿ CSAM ಫಲಿತಾಂಶಗಳನ್ನು ಹೇಗೆ ಪತ್ತೆಹಚ್ಚುತ್ತೇವೆ ಮತ್ತು ತೆಗೆದುಹಾಕುತ್ತೇವೆ, ಮತ್ತು ನಮ್ಮ ಸೇವೆಗಳಾದ್ಯಂತ CSAM ಉಲ್ಲಂಘನೆಗಳಿಗಾಗಿ ಎಷ್ಟು ಖಾತೆಗಳನ್ನು ನಿಷ್ಕ್ರಿಯಗೊಳಿಸಲಾಗಿದೆ ಎಂಬುದನ್ನು ತಿಳಿಸುತ್ತದೆ.

ನಾವು NCMEC ಯೊಂದಿಗೆ ಹಂಚಿಕೊಳ್ಳುವ CSAM ಹ್ಯಾಶ್‌ಗಳ ಸಂಖ್ಯೆಯ ಕುರಿತಾದ ಮಾಹಿತಿಯೂ ಪಾರದರ್ಶಕತೆ ವರದಿಯಲ್ಲಿರುತ್ತದೆ. ಇತರ ಪ್ಲ್ಯಾಟ್‌ಫಾರ್ಮ್‌ಗಳು CSAM ಅನ್ನು ವ್ಯಾಪಕವಾಗಿ ಗುರುತಿಸಲು ಈ ಹ್ಯಾಶ್‌ಗಳು ಸಹಾಯ ಮಾಡುತ್ತವೆ. NCMEC ಹ್ಯಾಶ್ ಡೇಟಾಬೇಸ್‌ಗೆ ಹ್ಯಾಶ್‌ಗಳನ್ನು ಒದಗಿಸುವುದು, CSAM ವಿರುದ್ಧ ಹೋರಾಡುವ ಪ್ರಯತ್ನದಲ್ಲಿ ನಾವು ಮತ್ತು ಉದ್ಯಮದಲ್ಲಿನ ಇತರರು ಸಹಾಯ ಮಾಡಬಹುದಾದ ಒಂದು ಪ್ರಮುಖ ವಿಧಾನವಾಗಿದೆ, ಏಕೆಂದರೆ ಈ ಸಾಮಗ್ರಿಯ ಮರುಹಂಚುವಿಕೆಯನ್ನು ಇದು ಕಡಿಮೆಗೊಳಿಸುತ್ತದೆ ಮತ್ತು ದೌರ್ಜನ್ಯಕ್ಕೆ ಒಳಗಾದ ಮಕ್ಕಳು ಇದರಿಂದಾಗಿ ಮತ್ತೆ ಬಲಿಪಶುಗಳಾಗುವುದನ್ನು ಕಡಿಮೆ ಮಾಡುತ್ತದೆ.

ನಮ್ಮ ಉತ್ಪನ್ನಗಳನ್ನು ಬಳಸುವ ಮಕ್ಕಳನ್ನು ಪ್ರಚೋದನೆ, ಲೈಂಗಿಕ ಕಾರಣಗಳಿಗೆ ಸುಲಿಗೆ, ಮಾನವ ಕಳ್ಳಸಾಗಣೆ ಹಾಗೂ ಮಕ್ಕಳ ಮೇಲಿನ ಇತರ ರೀತಿಯ ಲೈಂಗಿಕ ಶೋಷಣೆಯಿಂದ ರಕ್ಷಿಸಲು ನಾವು ಬಯಸುತ್ತೇವೆ. ನಮ್ಮ ಉತ್ಪನ್ನಗಳನ್ನು ಮಕ್ಕಳು ಬಳಸುವುದಕ್ಕೆ ಸುರಕ್ಷಿತವಾಗಿರಿಸಲು ನಮ್ಮ ಕೆಲಸದ ಭಾಗವಾಗಿ, ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ಕಂಟೆಂಟ್‌ನ ಕುರಿತು ಸೂಕ್ತ ಅಧಿಕಾರಿಗಳಿಗೆ ವರದಿ ಮಾಡಲು ಬಳಕೆದಾರರಿಗೆ ನೆರವಾಗಲು ನಾವು ಉಪಯುಕ್ತ ಮಾಹಿತಿಯನ್ನು ಒದಗಿಸುತ್ತೇವೆ.

Gmail ಅಥವಾ Hangouts ನಂತಹ Google ಉತ್ಪನ್ನಗಳಲ್ಲಿ ಒಂದು ಮಗುವನ್ನು ಅಪಾಯಕ್ಕೆ ಗುರಿಯಾಗಿಸಲಾಗಿದೆ ಎಂಬ ಅನುಮಾನ ಬಳಕೆದಾರರಿಗಿದ್ದರೆ, ಈ ಫಾರ್ಮ್ ಅನ್ನು ಬಳಸಿ ಅವರು ಈ ಕುರಿತು ವರದಿ ಮಾಡಬಹುದು. YouTube ನಲ್ಲಿ ಅನುಚಿತ ಕಂಟೆಂಟ್‌ನ ಕುರಿತು ಬಳಕೆದಾರರು ಫ್ಲ್ಯಾಗ್ ಮಾಡಬಹುದು, ಮತ್ತು Google Meet ನಲ್ಲಿ ಸಹಾಯ ಕೇಂದ್ರದ ಮೂಲಕ ಮತ್ತು ಉತ್ಪನ್ನದಲ್ಲಿ ನೇರವಾಗಿ, ದೌರ್ಜನ್ಯದ ಕುರಿತು ವರದಿ ಮಾಡಬಹುದು. ಬಳಕೆದಾರರು ಒಂದು ಮಗುವನ್ನು ಸಂಪರ್ಕಿಸದ ಹಾಗೆ ನಿರ್ಬಂಧಿಸುವುದು ಹೇಗೆ ಎಂಬ ಮಾಹಿತಿಯೂ ಸೇರಿದ ಹಾಗೆ, ಬೆದರಿಕೆ ಮತ್ತು ಕಿರುಕುಳದ ಕುರಿತಾದ ಆತಂಕಗಳನ್ನು ನಿಭಾಯಿಸುವುದು ಹೇಗೆ ಎಂಬ ಕುರಿತು ಸಹ ನಾವು ಮಾಹಿತಿ ಒದಗಿಸುತ್ತೇವೆ. ನಮ್ಮ ಮಕ್ಕಳ ಸುರಕ್ಷತೆ ನೀತಿಗಳ ಕುರಿತು ಹೆಚ್ಚಿನ ಮಾಹಿತಿಗಾಗಿ, YouTube ನ ಸಮುದಾಯ ಮಾರ್ಗಸೂಚಿಗಳು ಹಾಗೂ Google ಸುರಕ್ಷತಾ ಕೇಂದ್ರವನ್ನು ನೋಡಿ.